واحد اسمه "فيليب كريستودولو" كان بيستخدم محفظة Trezor.. ودي قطعة هاردوير زي الفلاشة كدة بتستخدم لتخزين العملات الرقمية.. صاحبنا اشتراها وخزن عليه رصيد بتكوين..
ومع تقلبات أسعار العملة كان حابب يتابع سعر البتكوين بتاعه كل شوية وبقى عامل كام.. فتح الآيفون بتاعه وبحث عن تطبيق Trezor وحمله من المتجر.. نزل التطبيق وكتب الـSeed Phrase بتاعته.. ودي حاجة زي كلمة السر كدة بيتم استخدامها لنقل رصيد من محفظة لمحفظة تانية في حالة فشل الدخول للمحفظة الأصلية.
المهم صاحبنا يكتشف بعدها إن شركة Trezor مفيش ليها تطبيقات أصلا على الموبايل.. وإن التطبيق اللي نزله كان تطبيق مزيف !
صاحبنا اتسرق منه 17 عملة بتكوين قيمتهم حاليا مليون دولار.
التطبيق المزيف كان موجود على المتجر بنفس اسم الشركة واللوجو بتاعها.. وبالرغم من مراجعة آبل لكل التطبيقات بشكل يدوي لكن التطبيق اتوافق عليه ونزل المتجر وصاحبه اشترى خدمة تقييمات مزيفة عشان يخلي التطبيق يكتسب ثقة أكبر ويصطاد زباين.
اجمالي المبالغ اللي اتسرقت من مستخدمي الآيفون خلال الخدعة دي وصلت 1.6 مليون دولار.. ونفس الموضوع اتعمل على متجر جوجل بلاي واتسرق من مستخدميه 600 ألف دولار.
نصيحة للناس اللي بتستخدم تطبيقات مالية أو تطبيقات بتستخدم فيها الفيزا.. احرص على التأكد من التطبيق قبل ما تستخدمه واقرأ المراجعات بتاعته واتأكد من معلومات المطور قبل ما تحمل التطبيق وتستخدمه.
المصدر :
إرسال تعليق
أخي الزائر قبل التعليق تذكر قول الله تعالي " مَّا يَلْفِظُ مِن قَوْلٍ إِلَّا لَدَيْهِ رَقِيبٌ عَتِيدٌ " فأي تعليق مسئ لصاحبه وليس لكاتب المحتوي .